1919-ൽ ഇറ്റലിക്കാരനായ ജേക്കബ് എന്ന ഒരു എഞ്ചിനീയർ തയ്യാറാക്കിയ റിപ്പോർട്ടിലാണ് ഇടുക്കിയിൽ ഒരു അണ കെട്ടാനുള്ള സാദ്ധ്യതയേക്കുറിച്ച് ആദ്യമായി പരാമർശിച്ചു കാണുന്നത്. ആ റിപ്പോർട്ട് തിരുവിതാംകൂർ സർക്കാർ പരിഗണിച്ചില്ല. പിന്നീട് മലങ്കര എസ്റ്റേറ്റ് സൂപ്രണ്ടായിരുന്ന ഡബ്ല്യൂ.ജെ.ജോൺ 1922-ൽ ഇടുക്കി കണ്ടെത്തി. നായാട്ടിന് അദ്ദേഹത്തെ അനുഗമിച്ചിരുന്ന കരുവെള്ളായൻ കൊലുമ്പൻ എന്ന ആദിവാസിയാണ് ഇടുക്കി ചൂണ്ടിക്കാട്ടിയത്. 'കുറവൻ', 'കുറത്തി' എന്നിങ്ങനെ അറിയപ്പെടുന്ന രണ്ടു മലകൾ പാദങ്ങൾ തമ്മിൽ പരസ്പരം തൊട്ടു തൊട്ടില്ല എന്ന മട്ടിൽ ഉയർന്നു നിൽക്കുന്നു. അൽഭുതകരമായ ആ ഇടുക്കിലൂടെ പെരിയാർ കുതിച്ചൊഴുകുന്നു. ഇവിടെ ഒരു അണക്കെട്ടു നിർമ്മിക്കുക എളുപ്പമാണെന്നും അതിൽനിന്നും ജലസേചനവും വൈദ്യുതോല്പാദനവും സാധിക്കാമെന്നും മലങ്കര ജോൺ, സഹോദരനും എഞ്ചിനീയറുമായ ശ്രീ.പി.ജെ.തോമസിന്റെ സഹായത്തോടെ 1932-ൽ തിരുവിതാംകൂർ സർക്കാറിനെ അറിയിച്ചു.
 |
| കരുവെള്ളായൻ കൊലുമ്പൻ |
വീണ്ടും 1935-ൽ അസംബ്ലി മെമ്പറായിരുന്ന ശ്രീ.കെ.എ.നാരായണപിള്ള ഇടുക്കിക്കാര്യം സർക്കാരിന്റെ ശ്രദ്ധയിൽപ്പെടുത്തി. തിരുവിതാംകൂർ സർക്കാരിനുവേണ്ടി ഇറ്റലിക്കാരായ ആഞ്ജലോ ഒമേദയോ, ക്ലാന്തയോ മാസെലെ എന്നീ എഞ്ചിനീയർമാർ 1937-ൽ ഇടുക്കിയെക്കുറിച്ച് പഠനം നടത്തിയെങ്കിലും കാര്യങ്ങൾ മുമ്പോട്ടു പോയില്ല. ഏറെക്കുറെ വ്യക്തമായ ഒരു പ്രാഥമിക റിപ്പോർട്ടുണ്ടാകുന്നത് 1947-ൽ ആണ്. അന്ന് തിരുവിതാംകൂർ ഇലക്ട്രിക്കൽ എഞ്ചിനീയറായിരുന്ന ശ്രീ.ജോസഫ് ജോൺ ഒരു റിപ്പോർട്ട് തയ്യാറാക്കി. പെരിയാറിനേയും ചെറുതോണിയേയും ബന്ധിപ്പിച്ച് ഒരു അണ കെട്ടുകയും അറക്കുളത്ത് വൈദ്യുത നിലയം സ്ഥാപിക്കുകയും ചെയ്യാമെന്നായിരുന്നു അദ്ദേഹത്തിന്റെ നിർദ്ദേശം.
 |
| ഇടുക്കിയിലെ പാറയിടുക്ക് - ആർച്ച് അണക്കെട്ടിന്റെ സ്ഥാനം - ഇടത്ത് 'കുറവനും' വലത്ത് 'കുറത്തിയും'. കോഫർ ഡാമും അതിന്റെ ഇടതുവശത്തായി ജലം ഡൈവേർഷൻ ടണലിലേയ്ക്ക് പ്രവേശിക്കുന്നതും മറുഭാഗത്ത് ടണലിനു പുറത്തേയ്ക്ക് ജലം പതഞ്ഞ് ഒഴുകുന്നതും കാണാം. |
1956-ൽ സമഗ്രമായ അന്വേഷണ പഠനം നടത്തപ്പെട്ടു. 1957-ൽ കേന്ദ്ര ജലവൈദ്യുത കമ്മീഷൻ അന്വേഷണ പഠനം നടത്തി. ആധുനിക രീതിയിലുള്ള രൂപസംവിധാനം ഇടുക്കിക്ക് നൽകപ്പെടുന്നത് 1961-ൽ ആണ്. അതിന് 1963 ജനുവരിയിൽ പ്ലാനിംഗ് കമ്മീഷന്റെ അംഗീകാരം ലഭിച്ചു. ഇടുക്കിയുടെ സാമ്പത്തിക ചുമതല കേരളാ സംസ്ഥാന വിദ്യുച്ഛക്തി ബോർഡ് ഏറ്റെടുത്തു.
കാടു വെട്ടിത്തെളിക്കുക, റോഡുകളും പാലങ്ങളും നിർമ്മിക്കുക, സർവ്വേ നടത്തുക തുടങ്ങിയ ജോലികൾ 1962-ൽ ആരംഭിച്ചിരുന്നു. 1966 ആയപ്പോൾ ആധുനിക ഇടുക്കി പദ്ധതിയുടെ എല്ലാ അംശങ്ങളെ സംബന്ധിച്ചും വ്യക്തമായ തീരുമാനത്തിലെത്തി ക്കഴിഞ്ഞിരുന്നു. 1966-ൽ ഇടുക്കിക്ക് കൊളംബോ പദ്ധതിപ്രകാരം കാനഡ സഹായവാഗ്ദാനം നൽകി. 78 ലക്ഷം കനേഡിയൻ ഡോളറിന്റെ സഹായ ധനവും 115 ലക്ഷം കനേഡിയൻ ഡോളറിന്റെ ദീർഘകാല വായ്പയും ഇടുക്കിക്ക് കാനഡ നൽകുകയുണ്ടായി. 1967-ൽ ഇന്ത്യയും കാനഡയും ഇതു സംബന്ധിച്ച കരാർ ഒപ്പുവച്ചു. 1968 ഫെബ്രുവരി 17 ന് നിർമ്മാണ പ്രവർത്തനങ്ങൾ ആരംഭിച്ചു.
 |
| രാമക്കൽമേട്ടിൽ സ്ഥാപിച്ചിരിക്കുന്ന കുറവൻ-കുറത്തി പ്രതിമകൾ |
ആർച്ച് അണക്കെട്ട് വിദഗ്ദ്ധരാണ് ഫ്രാൻസുകാർ. 1960-ൽ ഫ്രാൻസിന്റെ സഹായത്തോടെ ഒരു ആർച്ച് അണക്കെട്ട് നിർമ്മിച്ച കാനഡയാണ് ഇടുക്കിയോട് സഹകരിച്ചത്. കാനഡയിലെ 'സർവെയർ, നെനിഗർ ആന്റ് ഷെനിവർട്ട്' (SNC Inc.) എന്ന കമ്പനിയായിരുന്നു ഈ പദ്ധതിയുടെ വിദഗ്ദ്ധോപദേശകർ. ഇടുക്കി ആർച്ച് അണക്കെട്ടിന്റെയും മൂലമറ്റം ഭൂഗർഭ വൈദ്യുത നിലയത്തിന്റെയും എഞ്ചിനീയറിംഗ് ഉത്തരവാദിത്വം കാനഡക്കായിരുന്നു. കേരളാ സംസ്ഥാന വിദ്യുച്ഛക്തി ബോർഡും ഇന്ത്യയിലെ ആർച്ച് അണക്കെട്ട് വിദഗ്ദ്ധരിൽ ഒരാളായ ഡോ.സ്വാമിനാഥനും ഇവയുടെ സൂക്ഷ്മ പരിശോധനയും മേൽനോട്ടവും വഹിച്ചു പോന്നു.
No comments:
Post a Comment